Кощхьэблэ районым ит къуаджэу Еджэркъуае фэгъэхьыгъэ сайт Интернетым къыщызэIуахыгъ. Ащ къихьэгъэ къэбархэмрэ тхыгъэхэмрэ тяджагъ, тыгу рихьыгъэх ыкIи тагъэгушIуагъ. Сайтыр къызэIузыхыгъэм Еджэркъуае ехьылIэгъэ къэбарэу ыгъотыгъэр зэкIэ къыригъэхьагъ. Къэбархэм ренэу ахегъахъо, къэбарыкIэхэм алъэхъу. Къуаджэм икъэхъукIэ къыщегъэжьагъэу инепэрэ щыIакIэ къынэсэу сайтым нэIуасэ зыщыфэтшIышъущт. Къэбар гъэшIэгъон къызылъыIэсыжьыгъэ е ишIошIхэмкIэ цIыфхэм адэгуащэ зышIоигъохэр сайтым къырагъэблагъэх, ятхыгъэхэр къыхаутых. Iофыгъо зэфэшъхьаф 40 фэдизмэ сайтым уащытегущыIэн уфит. Ахэр Еджэркъуае къыкIугъэ гъогум, цIыф цIэрыIоу къыдэкIыгъэхэм, ныбжьыкIэхэм, ахэм спортыр шIу зэралъэгъурэм, нэмыкIхэми афэгъэхьыгъэх. Къуаджэм ом изытет мафэ къэс зыщыфэдэщтыри сайтым къыредзэ. ХьакIэщэу зэхищагъэм урегъэблагъэ. Сайтым къихьэрэ цIыфхэм уадэгущыIэн плъэкIыщт. БзитIум язэу, адыгабзэмрэ урысыбзэмрэ, узыфаемкIэ укъэтхэн уфит. Джащ фэдэу сурэтхэм, мэкъэгъэIухэм, зэдэгущыIэгъухэм афэгъэхьыгъэ едзыгъохэр иIэх. Адыгэ быракъым, адыгэ лъэкъуацIэхэмрэ тамыгъэхэмрэ, адыгэ хабзэм, мэкъамэхэм, культурэм къатегущыIэрэ тхыгъэхэр ныбжьыкIэхэмкIэ пшъхьапэх. Сайтым Еджэркъуае щыпсэухэрэм язакъоп зилIэкъо тамыгъэхэр къизыдзагъэхэр. Абдзаххэм, бжъэдыгъухэм, мэхъошхэм, кIэмгуехэм, убыххэм, черкесхэм, шапсыгъэхэм яехэри иплъэгъощтых. Зитамыгъэ зыфэдэр зымышIэхэрэмкIэ ар IэпыIэгъушIу. Еджэркъуаехэм афэдэу адыгэ къуаджэ пэпчъ сайтхэр яIэхэ зыхъукIэ, цIыфхэр нахь зэрэшIэнхэмкIэ, къуаджэхэм къащыхъурэ-къащышIэхэрэр зэлъагъэIэсыжьынхэмкIэ ишIуагъэ къэкIощт. Къызщыхъугъэ къуаджэр къызытIысыгъэм къыщегъэжьагъэу зэрэпсэугъэр, гъэхъагъэу ышIыгъэхэр, ар зыгъэдэхэгъэ цIыфхэр зыфэдагъэхэр цыпэ-цыпэу къоджэдэсхэм аугъоижьынхэ алъэкIыщт. Лъэпкъ тарихъым сайтым чIыпIэ гъэнэфагъэ щыриI. НэмыкI сайт зэфэшъхьафхэм къарыхьэгъэ тхыгъэ гъэшIэгъонхэу адыгэхэм яблэкIыгъэ уахътэ фэгъэхьыгъэхэм ущяджэн плъэкIыщт. Ащ къыхэхыгъ Анцокъо Был Мусафэ ыкъоу илъэс 74-рэ зыныбжьыгъэм къыIотэгъэ къэбарэу 1940-рэ илъэсым шэкIогъу мазэм, Хьэсаныкъо Р. ытхыжьыгъагъэр. мары ар: «Мэз чIэгъым къычIэкIыхи Лабэ дэжь къызэтIысыхэм адыгэхэм унашъо яIэу зэдэпсэущтыгъэх, лIы хэхыгъэхэр яIагъэх. Унэгъо 50 пэпчъ ичIыгу Iахь ратыщтыгъ, чIыгур плIэу зэтыраутыщтыгъ. УнэгъуиплI пэпчъ зы пхъэIашэ иIагъ, ащ цуий кIэшIэгъагъ, нэбгыриплI игъусагъ. ЛэжьакIо зыдэкIыхэкIэ, къакъыр кIыхьэ ашIыти, ащ яIапIэхэр чIалъхьэщтыгъэх. ЧIыгур къорэгъкIэ агощыщтыгъ. Нахьыжъым быракъыр зыдигъэчъаекIэ, жъоныр рагъажьэщтыгъ. Загъэпсэфынэу зыхъукIи быракъым къыгъэлъагъощтыгъ. ЗэкIэри зэдэIэпыIэхэзэ, Iоф зэдашIэщтыгъэ. Лэжьыгъэр залэжькIэ, иугъоижьын унагъо пэпчъ хэлажьэщтыгъ. Шхынхэр унагъо пэпчъ щашIыщтыгъэх. ГъэжъохэкIхэр, бахъсымэр, мэджаджэр агъэхьазырыщтыгъэх. ТхьэчIэгъ адыгэхэр къызычIэкIыгъэхэр илъэс зытIущ зэхъум джащ фэд зэрэщыIагъэхэр. Ащ ыуж «межевойкIэ» чIыгур агощи, шъхьадж иунагъо фэлэжьэжьынэу хъугъагъэ. Ажгъойкъо Аслъанбэч горскэ судэу Мыекъуапэ дэсыгъэти, ащ чIыгу Iахьыр къыщыратыгъагъ». Къэбарыр къэзыIотэгъэ Бэл къызыщыхъугъэр къуаджэу Гъобэкъуай, зыдэсыгъэр Еджэркъуай. Къэнагъэр сайтыр къызэIузыхыгъэм нэIуасэ шъуфэтшIынэу ары. Ар кIэлэ ныбжьыкI, Еджэркъуае къыщыхъугъ, Краснодар дэт къэралыгъо аграрнэ университетым щеджэ, я 5-рэ курсым ис. ЫцIэр Темыркъан. Брыцухэм ащыщ.
Аферым, Темыркъан!
Шъаукъо Аслъангуащ.
Статья из газеты "Адыгэ макъ" от 14 марта 2013.
Источник: http://www.adygvoice.ru/newsview.php?uid=10243 | 
