Главная » 2012 » Сентябрь » 22 » ЩыIэныгъэм ухэзыщэрэ цIыф
14:47 ЩыIэныгъэм ухэзыщэрэ цIыф |
Къуаджэм дэс ныбжьыкIэхэр физкультурэмрэ спортымрэ апыщэгъэнхэр ипшъэрылъ шъхьаIэу Дэгужъые Мыхьамод елъытэ. Кощхьэблэ районым и ДЮСШ самбэмрэ дзюдомрэкIэ итренер, Еджэркъуае щэпсэу. Икъоджэгъухэм, ыгъэсэрэ кIэлэеджакIохэм янэ-ятэхэм, дэгъоу зышIэрэмэ къэбар гъэшIэгъонэу къыраIолIагъэр къыдэтлъыти, М. Дэгужъыем гущыIэгъу тыфэхъугъ.
Гъэсэныгъэм гъунэ имыIэу Дэгужъые Мыхьамод ылъытэзэ, спортым щигъотыгъэ ныбджэгъухэм, ригъаджэхэрэм къатегущыIэ. ЩыIэныгъэм пэблэгъэ шъыпкъэу иIофхэр къыIуатэхэу зыфежьэкIэ, ыгъэсэрэ еджакIохэр ынэгу кIэтхэу, яушъыи шIоигъоу къытщэхъу. Къиныгъохэм защидзыерэп. Загъорэ хэщэтыкIы, ышъхьэ къеIэтышъ, нэгушIоу къытэплъы.
- КIэлэцIыкIухэм янэ-ятэхэу Шэхэнэ Заур, Батышэ Нурбый, Чыпэкъо Бислъан, Дэгужъые Светлан, Айтэчыкъо Мурат, нэмыкIхэри упчIэжьэгъу сэшIых, - къеIуатэ М. Дэгужъыем, - IэпыIэгъу къытфэхъунхэм сыдигъуи фэхьазырых. ЕджапIэмрэ унагъомрэ зэрэзэпхыгъэхэм елъытыгъэр бэ. Ны-тыхэр уимыгъусэхэу пIуныгъэ Iофыр узэрэфаем фэдэу зэхэпщэн плъэкIыщтэп.
Ны-тыхэм агурэIо
КIалэр ебгъэзызэ самбэмкIи, дзюдомкIи сыдэущтэу бгъэбэнэщта? УпчIэм иджэуап мы сатырхэр къэзытхырэ журналистыр лъыхъузэ, Еджэркъуае щыщэу Батышэ Нурбый дэгущыIагъ.
- Сишъао зыгъэсэрэ тренерым укъыщытхъущт къодыеп, щысэтехыпIэу ябгъэлъэгъун фае, - еIо Батышэ Нурбый. - Спортсменхэр цIыф къызэрыкIохэп. Непэ ебгъэзэу, алырэгъум тетэу мэбанэкIэ сыда къикIыщтыр? КIалэр мафэм мышхагъэми, зигъэпсэфынэу игъо имыфагъэми хэта зышIэрэр? Дэгужъые Мыхьамод тиунэгъо къэбархэм ащыгъуаз, икIалэхэм афэдэу ыгъасэрэмэ апылъ. ГукIэгъу ахэлъэу зэрипIухэрэр лъэшэу тэгъэшIагъо.
Н. Батышэм къызэриIорэмкIэ, бэнэпIэ алырэгъум кIэлэеджакIохэр къызытекIыжьхэкIэ, зэбгырыкIыжьынхэм дэгуIэхэрэп. Тренерым къеуцокIыхэшъ, спортым, щыIэныгъэм атегущыIэх. М. Дэгужъыер адыгагъэм, лъэпкъ шIэжьым къапкъырыкIызэ, псауныгъэм игъэпытэн, къоджэ щыIакIэм изыкъегъэIэтыжьын, нэмыкIхэм иеплъыкIэхэр къареIуалIэх.
Ригъэджагъэр къыгоуцожьы
- Сыригъэджагъ, ишIогъэшхо къысигъэкIыгъ, - игупшысэхэм тащегъэгъуазэ Кощхьаблэ щыпсэурэ предпринимателэу, СССР-м спортымкIэ имастерэу, апшъэрэ гъэсэныгъэ зиIэ Ожъ Бислъан. - Дэгужъые Мыхьамод сигъэсагъ. Спортсмен цIэрыIо сымыхъугъэми, дзюдомрэ самбэмрэ къысхалъхьагъэр шIукIэ зыфэслъэгъурэр къоджэ тренерыр ары. Сэлам зэретхыщт закъом пае ыдэжь тыкIоу бэрэ къыхэкIы.
Джырэ уахътэ спортсменхэр гъогу чыжьэ техьанхэм фэшI ящыкIагъэр макIэп. Ожъ Бислъан къызыщытхъужьыгъэп. М. Дэгужъыем ыгъэсэрэ кIалэмэ IэпыIэгъу зэрафэхъурэр къытфиIотагъэп. Ны-тыхэмрэ тренерымрэ тызыщагъэгъозагъэм тигъэгушхуагъ. Б.Ожъым гъогупкIэр спортсменхэм къафегъоты, спорт шъуашэхэр афещэфых, зэнэкъокъухэр зэхащэхэ зыхъукIэ ишIуагъэ арегъэкIы. Ожъ Бислъан ишIуагъэкIэ Саранскэ, Москва, Саратов, фэшъхьаф къалэхэм къоджэ спортсменхэр ащыIагъэх, зэнэкъокъухэм ахэлэжьагъэх.
Еджэркъое кIалэхэм илъэси 6 хъугъэу тренерэу Iоф адешIэ М. Дэгужъыем. Чылэм щыщ кIалэхэу Шэхэнэ Мурадин, Чыпэкъо Адам, Шэхэнэ Нурдин, Дэгужъые Батыр, Къэлэдый Рузан, Батышэ Исхьакъ, Хьакурынэ Аскэр, Айтэчыкъо СултIан, нэмыкIхэри бэнакIэмэ афегъасэх. Къыблэ шъолъырым изэнэкъокъухэм хагъэунэфыкIырэ чIыпIэхэр къащыдахыгъэх, Урысыем иныбжьыкIэхэм язэIукIэгъухэм Айтэчыкъо СултIанэ джэрз медальхэр къащихьыгъ.
Еджэркъое «Пегъымбарыр»
М. Дэгужъыер самбэмкIи, дзюдомкIи СССР-м спортымкIэ имастер, СССР-м изаслуженнэ тренерэу Кобл Якъубэ ипащэу бэнакIэхэм зафигъэсагъ. Еджэркъуае къыдэкIыгъэх спортымкIэ дунэе класс зиIэ мастерхэу Джарымэ Аслъан. - Адыгэ Республикэм иапэрэ Президент, Европэм ичемпионэу Гостэкъо Хьумэр, дунаим гъогогъу 11 самбэмкIэ ичемпионэу Хьасанэкъо Мурат, нэмыкIхэри.
КIэрмыт Казбек, Iэшъынэ Евгений, Костэкъо Гъумэр, Емыж Арамбый, ГутIэ Руслъан, Аристотель Спировыр, Хьэпэе Арамбый, нэмыкIхэри общежитием зэдисхэу Мыекъуапэ щеджэщтыгъэх.
- ПсынкIэу ащыгъупшэжьырэмэ Дэгужъые Мыхьамод ащыщэп, - нэщх-гущхэу Хьэпэе Арамбый къеIуатэ. - Непи тызэхахьэ. ИцIыфыгъэкIэ сыгу рехьы. КIэлэеджакIохэр «зэригъэпкIынхэм» фэгъэсагъ. Iэдэбныгъэм фепIух. Сэмэркъэу хэлъ. Ащ пае пхъэшагъэ къызыхимыгъафэу щытэп. ЦIыф «пыт» зыфаIорэм фэд. Чылэм дэс ныбжьыкIэм хэплъхьан плъэкIыщтым щыгъуаз. Бырсыр къыпыкIырэп, гуетыныгъэ хэлъ. УшIонапэмэ, къыпфигъэгъущтэп. ИкIэлэгъум уфэупцIэу щытыгъ. Анахьэу къыхэдгъэщыщтыгъэр цIыфыгъэу хэлъыр зэримыукъощтыгъэр ары. «Пегъымбар» - джары тызэреджэщтыгъэхэр. ДзюдомкIи, самбэмкIи СССР-м спортымкIэ имастерэу М. Дэгужъыем гъогу удытехьэмэ укIэгъожьыщтэп, бысым къызыпфэхъукIэ, узэригъэлъапIэрэр къызыхимыгъэщэу, цIыфмэ уахищэн, уакъыхищыжьын зэрилъэкIырэр гущыIэкIэ къэмыIоу плъэгъуныр нахьышIу. Пегъымбар мафэ къэс уIукIагъэми уезэщыщтэп.
Адыгэ лъэпкъым испортсмен цIэрыIоу Хьасанэкъо Мурат иапэрэ тренерэу Бэрзэдж Шыхьам идунай ыхъожьыгъ. Ащ фэгъэхьыгъэ зэнэкъокъухэр Еджэркъуае илъэс къэс щызэхащэх. М. Дэгужъыер кIэщакIомэ ащыщ.
Къоджэ спортым зыкъегъэIэтыгъэным, лъэпкъ шIэжь ныбжьыкIэхэм яIэным М. Дэгужъыем игупшысэхэр фэгъэзагъэх. «Адыгэ макъэм» иныбджэгъушIоу зэрэщытыр тэшIэ, тыфэраз. ИгухэлъышIухэр Тхьэм къыдигъэхъунхэу тыфэлъаIо.
Сурэтым итыр: Дэгужъые Мыхьамод.
ЕмтIылъ Нурбый. |
|
Просмотров: 739 |
Добавил: Егерухай
| Рейтинг: 0.0/0 |
|
| Наши друзья |
|---|
Джэгуак1уэ
Черкесы (адыги) - история и генеалогия
ELOT.RU
Черкесский сайт - для черкесов, о черкесах
МО Егерухай
Сайт администрации МО аул Егерухай |
|
